Published on 20-05-2019
星宇控股（02346）上周四掛牌，主要業務為生產及銷售燒結釹鐵硼磁性材料，產品可應用於發動機及電子揚聲器等終端行業。以招股反應來看，認購程度並不踴躍，唔係好吸引到「條街」既眼球，只有11.38倍超額及僅以1.00元下限定價。
不過，股份上市前夕卻突然惹來關注，主要係受到「股壇長毛」David Webb加持，指公司既獨立非執董范駿華，即立法會前主席范徐麗泰個仔，唔乎合聯交所去年新增的獨董指引，同時招股書上既履歷有誇大之嫌。
姑勿論David Webb的指控是否真確，范駿華的確「有料」，除了擔任星宇獨董外，亦都係莊士中國（00298）、新華電視（08356）、文化傳信（00343）及富臨（01443）等合共9家上市公司獨董，去年單係收取袍金都有成兩球港紙，你話係邊到揾，果然呢個世界係識人好過識字。
「在家靠父母 出外靠朋友」呢個金科玉律真係唔到你唔認同，朋友唔多，就要識投胎。睇埋其他董事，你就會發現最大粒又最後生嗰個叫做呂竹風先生，芳齡只有三十四歲，已經係公司既主席、CEO同埋執董，相對五十九歲人先攞到個非執董位黎做既另一位呂先生，可謂後生可畏，前途無可限量。不過，後者係佢老竇兼創辦人，同時亦都應該係真正話事人。
從呢隻股份，可以悟出兩個道理，第一朋友係好緊要，第二其實老竇仲緊要，無疑呢啲都係「廢話」。不過，呢啲市況真係諗唔到有咩好炒，唯有講吓廢話，「瓦吓」字數。話雖如此，星宇控股又唔係絕對無得炒既，始終壞消息好過無消息，叫做有啲報道同你免費宣傳，好似佢第二日都爆升左兩成二。等佢沖穿高位1.43元追入，再以上周五1.36元收市價做止蝕，都係拎大約半成去博，都不妨一試。
股壇潘安
Email: panan201810@gmail.com
本文僅屬個人研究，不構成任何投資建議。
