Published on 03-06-2019
如果你抽中咗隻招股價係四毫半既股票，而佢掛牌第一口價係三毫九仙半，即刻輸一成，你心情會係點呢? 諗住再等，認為佢震倉姐，嚇唔到我既，咁收市你就可以再輸「柑」啲，無左三成。見慣大場面既你，仍然未驚過，再等多幾日，咁恭喜你，你帳面已經輸超過四成，可以唔洗煩止蝕，仲有幸一暏佢低見兩毫五仙半既風采。睇到呢到仲願意睇落去既你，相信都唔會係羚邦集團（02230）既苦主。
「羚」字面解，可分開為「令」、「羊」兩字，所以你選擇買既時候應該有心理準備，呢隻係「令羊」股，係有機會輸到「hihi」既。不過，對於無貨既你，或者係一個機會都唔定，因為根據維基百科解釋，羚羊是偶蹄目牛科動物，個別品種具有驚人既彈跳能力，羚邦集團話唔埋都具有相同特性。
首先，以一個正常人嚟講，隻股由四毫半字，跌到去兩毫五仙半，點都會感到心灰意冷，沽鬼左去，費事眼冤。如果你選擇唔沽，到呢個水位，我諗你都唔會再沽住啦吓話，你睇成交由頭兩日夾埋超過三億股，到上星期五只淨返五百幾萬股就知啦，沽壓已經去到七七八八。另外，我覺得值博既原因係宜家係0.27元，相對最低價0.255元，只係5%多啲的差距，止蝕價清晰既同時，又唔會輸到入肉。除非gap down咁黑仔啦，咁我都無野好講。
仲有唔好以為羚邦集團名不虛傳，佢發行過劇集，相信你無睇過都聽過，好似「陪你去看流星雨落在這地球上」的《流星花園》，日本動畫《頭文字D》、《鋼之鍊金術師》及《小豬佩奇》（未聽過? Peppa Pig喎!!）等。另外，佢既主要客戶係阿里巴巴集團、Bilibili Inc.、東森電視事業股份有限公司、愛奇藝集團、Netflix Inc、深圳市騰訊計算機系統有限公司及TVB集團。
參考截至2016至2018年3月底的三個財年，期內溢利分別約3534.4萬、5357.7萬和9383.5萬港元，過去兩年增長率為51.59%和75.14%；以宜家市值5.38億計，市盈率不足6倍，絕對唔貴，現價真係有權大彈。不過，都係保險啲，因為唔知呢條「令羊」係咪真係咁生性，都係擺返0.255元做止蝕啦!!
股壇潘安
Email: panan201810@gmail.com
本文僅屬個人研究，不構成任何投資建議。
