Published on 07-07-2019
錦欣生殖（01951）同翰森製藥（03692）你會點揀? 論業務，好似錦欣生殖吸引啲喎，幫啲不育夫婦生仔，市場上又無呢類型股份，夠晒特別，而且認購反應都話埋俾你聽好多人有興趣，有近百倍既超額認購。相反，翰森製藥只係得10倍鬆啲既超額，做既野又係講近咩抗腫瘤、糖尿病同埋心血管等藥的研發，似乎市場上都揾到呢啲股份。
同時，翰森製藥個入場費又貴得驚人，宜家一手都講近要48700元，仲貴過騰訊（00700），邊個會買呀? 不過，唔受散戶歡迎，唔代表大戶唔鍾意，最近宣布的超額配股權就已經悉數行使，涉及8269.2萬股，相當於全球發售初步可供認購發售股份總數的15%。
事實上，一開始呢隻股都唔係好想散戶參與，招股時已經要28520元入場，堪稱史上最貴。陰謀論啲講，咪就係想炒貨源歸邊，等時機成熟就出嚟收割。咁幾時先熟，我諗斷估都唔會靠基金互相廝殺散貨啩。若果炒夠散俾散戶，我諗都要改細個每股賣買單位又或者拆細減低吓個交易成本先引到散戶進場。
相信一日未有呢啲動作，大跌的機會都唔會好大，而且睇返佢個交易模式，似乎都好有秩序，「梅花間竹」咁日升日跌咁抽上去，以目前情況嚟睇，應該就未玩完，仲有得去!!
股壇潘安
Email: panan201810@gmail.com
本文僅屬個人研究，不構成任何投資建議。
