Published on 15-07-2019
要數過去一星期最轟動既IPO新聞，應該非百威亞太（01876）上市「撻Q」莫屬，呢隻近5000億市值的招股王，疑似定價太過進取，嚇怕基金投資者，被逼「撤回」。相反，夾著一片噓聲的安樂工程（01977），就安安樂樂喺星期五（12日）成功掛牌，更以三成半升幅作結。
同日上市的物管股和泓服務（06093），亦係當日焦點，最高曾較招股價大升超過7成。不過，若以埋單計算，禮拜五首掛升得最多既股份，反而係隻無乜人留意的創業板股維亮控股（08612），單日飆升四成一。
睇返啲招股記錄，原來對上一隻創仔上市已經係兩個幾月前，而年初至今其實只有7隻新股係GEM到上市。相比舊年全年有成75隻創仔新股，宜家「8」字頭既股份可以話稀有動物。咁少創仔上市，相信是由於證監會嚴打啤殼，使創業板上市公司數目大減。
物以罕為貴，咁都上到市，我諗點都要留意吓，且幫佢上市既話唔埋都屬非等閒之輩!! 不過，今次幫維亮控股上市的保薦人中毅資本，其實舊年1月先攞到保薦人資格，佢既「處女作」就係呢單，所以都無乜往績可參考。
然而，之前樂亞國際（08195）遭GEM上市委員會讉責公司及數名董事違反《GEM上市規則》後，就喺今年初委任咗中毅資本做合規顧問，幫公司關於《GEM上市規則》既事宜做諮詢，同埋就企業融資提供意見。
無獨有偶，樂亞國際既股價，今年就突飛猛進，累計升咗超過一倍。究竟兩者有無關係，就不得而知，或者真係佢「腳頭好」，咁又或者可以「帶挈」埋維亮控股呢!?
維亮控股主要提供履帶起重機、磨椿機、反循環鑽機等租用服務，而客人的建築項目就集中喺澳門同香港，澳門收入佔比更由2016年的14.8%，大幅增至47.3%，可以見到近年澳門的業務對佢舉足輕重。同時，更有理由想信公司喺澳門既人脈應該相當不錯，包銷商之一係太陽國際更可見一斑。
股價首日升左四成，仲有無水位真係好難估，但我自己就有啲想會一會佢，定好止蝕價，相信都唔會輸入肉。由於只上左一日，無咩價位可作參考，唯有以0.70元作止蝕，呢個係佢當日成交量最大的價位，有成28.6M，佔全日成交量逾兩成，買入後收市價唔跌穿呢個價就繼續揸啦。
股壇潘安
Email: panan201810@gmail.com
本文僅屬個人研究，不構成任何投資建議。
