Published on 23-09-2019
信義光能（00968）分拆出嚟的信義能源（03868），主要經營太陽能站，5月底上市至今，暫時較IPO價1.94元升咗13.4%，算做無乜點炒過。呢隻股有趣既地方係，散戶好似對佢無乜興趣，公開招股時只有1.07倍既超額認購，但國際配售方面就甚為踴躍。
佢兩個基石投資者亦來頭不少，一個係申洲國際（02313）主席馬建榮全資擁有的千里馬投資有限公司，另一個則係羅氏針織創辦人羅定邦的後人，羅家一門幾傑，長子羅樂風係國際品牌Levi’s、GAP、UNIQLO和H&M「御用」製衣商晶苑國際（02232）的創立人，六子羅家聖係Bossini（00592）的大股東，而四子地產大炒家羅家寶就係今次對信義能源有興趣的投資者 。兩個基石投資者分別認購咗2.01億股同埋2.58億股，佔已發行股本的2.98%及3.82%。
除咗以上兩位投資者外，國際配售入面仲有一位XYS股東預留咗8.05億股，即相當於股權的11.92%。驟眼睇可以見到3個投資者已經佔據公司18.71%股權，計埋國際配售的超額，就會更加發現條街其實無乜貨，包銷商上市初期不單只喺市場上買咗1.57億股以應付國際配售超額認購，仲另外行使埋部份超額配售權1.25億股，呢部份加埋又無咗4.18%，係宜家25%街貨入面，上述提過的單位其實已包含22.89%，即大部份貨早已落晒自己友到。
此外，信義能源個派息政策都幾進取，計劃派息金額不低於可供分派收入的90%，甚至100%。CEO董貺漄解釋係因為太陽能發電是屬於自建類的資產，而自建類的資產特色就是收入同成本穩定，高派息政策有助吸引長期而且看重股息回報的投資者。不過實情應該係，大股東係信義光能，而其他股東又係自己友，根本就無乜街貨，所以唔怕益到街外人，派息高都無壞，都係自己袋返。
近日啲大陽能股開始有啲想郁，而呢隻股份有無乜街貨，夠晒乾身，炒起上嚟應該唔難，值得一吼。
股壇潘安
Email: panan201810@gmail.com
本文僅屬個人研究，不構成任何投資建議。
