Published on 30-03-2019
偉工控股（01793）呢間公司招股既時候，其實我都有昅過下，它主要係向地產商同政府提供屋宇建造、裝修及維修工程服務，兩者佔比大約是八成同兩成，而嚟近將會增加公營項目的比例。
留意佢係因為開頭諗住政府未來都係朝著增加房屋供應及活化工廈的方向進發，市場個餅日後有機會愈造愈大，而呢行對資金的需求都好高，行業的入行門檻唔低，對呢啲喺行內打滾左三十幾年，有一定人脈同客戶基礎的總承建商，相信應該存在著相當的優勢。
不過，現實同我所想好似有啲距離，因為我睇返佢盤數，其實都幾好睇唔好食，過去幾年的毛利率一直減少近，由2016年的10.1%跌到去舊年3月底只有7.9%，而上市前的最新數字更只有6.1%。同期的純利率仲誇張，從少得可憐的4.8%，進一步去到僅得1.0%。就咁睇落去，100蚊生意先得1蚊利潤，都幾無乜肉食。
偉工控股以0.625元定價上市，認購反應唔算熱烈，但都有16.23倍超額。由於超額15倍以上，所以都要喺國際配售到撥返啲落公開發售，將總發售股數提升至30%。分配結果顯示，甲組大部份的配發比例都係10幾%到，而甲組尾的大飛更加唔夠一成，略嫌唔夠乾身，可能都要啲時間收吓貨先會炒。保薦人係彤叔御用證券行鼎珮證券，暫時睇都係等佢升穿0.68元呢個高位先諗，始終市值細可能都有機會炒吓，留意住先啦!!
股壇潘安
Email: panan201810@gmail.com
本文僅屬個人研究，不構成任何投資建議。
