【與股同行】前事不忘 後事之師

港股上周陷偏淡的悶局,恒指下試兩萬五關不遂後,全周僅跌240點。新股市場則表現精彩,與大市大相逕庭,打破早前開盤即破發的宿命,6隻新股全部首日都有炒作,市差炒新股的氛圍再現。

其中,MOS HOUSE(01653)更較招股價0.19元炒高超過8成,收報0.35元。不過,它開市已經是0.30元,衝入去博,難度極高。睇返今次半新股的炒作,亦都不是全部要膽博膽,部份股份細心留意都有「手影」可以捉。

成志控股(01741)大升近5成之前一天,就曾出現過倉的舉動,喺0.64元及0.65元分別出現逾40球的成交,而其餘價位其實只有幾球或甚至一球鬆啲的交易量,而當天收市只是0.63元,與招股價0.625元,基本上是持平,值博率十足。

另外,分別在舊年10月及6月掛牌的飛霓控股(08480)及基地錦標集團(08460),上市1年後,控股股東就隨即出售股份。雖然沽出數量不是很多,只是已發行股本的12.0%及8.4%,但就足以作催化劑炒高。前者,10月初公布後,至今升87.5%,而基地錦標9月中發通告後,就飆逾1倍有多。最近,加緊留意上市1年的半新股既股權變動,話唔埋可以有不錯的回報。

今個星期仲留意到隻陸慶娛樂(08052),它喺2016年11月上市,宜家差不多掛牌近兩年,主要業務喺係澳門新濠天地搞夜場Club Cubic,另外去年第四季在海港城搞左間「六公館HEXA」(睇【微辣Manner】有時會見到,陳奕迅最近嗰條片就喺個度拍。)。當年,更揾左李升炫做基礎投資者,即係邊個? 咪韓國「Big Bang」嗰個勝利。

(圖片來源:六公館Facebook)
(圖片來源:勝利IG)

留意呢隻股既主要原因係市值細,只有1.3億元,而呢近個半月的成交明顯增加,而股價亦有慢慢上移,暫時納入觀察名單先。如果臨近收市企穩喺今個月高位0.079元之上,或者可能會追入博一博炒返轉。

股壇潘安

本文僅屬個人研究,不構成任何投資建議。

More Stories
【深夜點播】股壇潘安🎧Cookies《心急人上》