【與股同行】成都高速龜速前進

Published on 10-02-2019

恒指終企喺兩萬七點收市，甚麼英國硬脫歐、中美貿易糾紛似乎目前已經被拋諸腦後，完全無阻大市升勢。連受帶量採購影響的藥業股都成為開局升幅最勁板塊，似乎市場的風險胃納又再次撻著。

最近，夠晒Sexy既股份，要數當然係上季跌得最殘既衰股，藥業股外仲有車股同手機設備股，個個都好似食左藥咁，輪住勃起。不過，大市去到呢個水平始終都有啲戒心，自己都係偏向留意嗰啲穩陣得黎又有升幅的股份，就好似公路股。

公路股收入穩定，現金流強，多年來一直維持高息，絕對是防守的首選。雖然跑得慢、無速度、唔夠快，但純睇走勢起碼是今次逆市的佳品。江蘇寧滬(00177)呢半年就升左三成，深圳高速(00548)更只是用左兩個多月就彈三成，而浙江滬杭甬(00576)四個月鬆啲升左超過三成半。呢批股份都有個共通點，就係日日慢慢升，未必引起市場注意，不過就揼石仔咁上。

既然公路股有勢，不如就揾返同板塊的股份，而啱啱上個星期，就有隻公路股成都高速(01785)上市，似乎值得留意。選呢隻股個邏輯好簡單，炒5G概念時，就炒起鐵塔(00788)；炒黃金時，就炒起山東黃金(01787)；背後原因就係半新股無蟹貨，容易踢起。今次隻成都高速，又係無咩人認購，仲繼續係招股價2.20徘徊未炒過，而P/E仲要只係6.5倍到，公路股來講屬偏低。以公路股走勢推斷，絕對有潛力龜速前進。