【與股同行】「符籙」之選途屹控股

Published on 22-07-2019

上個禮拜，好似又係得返啲教育股比較穩陣，之前講既中國東方教育（00667）就創咗上市新高; 另外，仲有思考樂教育（01769）同埋嘉宏教育（01935）分別有23.17%同7.01%既升幅。教育股已經升咗，再講都無乜意思，但今個星期好似又唔覺有咩新股好講。

睇啲招股資料，本來想講吓隻鷹普精密（01286），見佢個基石投資者係中國結構調整基金，好似幾有趣。呢個規模達到3500億元人民幣的基金，是國內最大的私募股權投資基金。受國務院國資委委託，由中央企業國有資本運營公司試點企業中國誠通控股集團有限公司牽頭，8家央企共同發起。

鷹普精密獲此基金入股，似乎背後有國家撐腰，不過可惜既係，佢個股價好似有「外國勢力」介入咁，有啲「西」，所以都暫且都係觀察住先。

另外，以走勢嚟講，隻途屹控股（01701）反而可能有得諗吓，上市價0.52元，首掛最高做過0.43元，之後日日潛水，上星期五低見0.223元，較招股價足足跌左五成七後，就反彈至0.255收市。論股價無疑係唔掂，但似乎可以博吓「符籙」，有個較大幅度既反彈。

首先，上個星期都其實處於低位橫行狀態，而且無乜成交，只係上個禮拜五才突然「發癲」，所以有理由相信已經見左短期底。此外，股價咁短時間跌咗一半，有個似樣既反彈都唔過份。最後就係，買賣盤個量非常懸殊，好多大單掛係ASK嗰邊等沽，但買個邊就得好少盤，照理想沽既話，明知買盤少，都唔會掛晒出嚟，嚇走人卦。掉返轉諗，似乎炒高機會更大。