Published on 03-10-2019
「昨天的我，你愛理不理; 今天的我，你高攀不起。」係「搖滾巨星」馬雲在一次公開演講中既開場白。呢句說話，似乎套落百威亞太（01876）到都幾合適。
以下限27蚊定價既佢，只獲得3.64倍超購，場面冷清，肯入飛既都「求仁得仁」。不過，世事就總是讓你猜不透，偏偏喺無人睇好既情況下，佢就連升兩日，去返招股上限價30元附近。
講真「股輪齊發」我自己都有啲戒心，心諗有無咁荀，炒高俾你賺呀? 美團（03690）咪就係咁，上市即潛囉。不過，佢咁快獲納入富時環球股票指數同埋恒生綜合指數，而10月中又如無意外會成為「北水」新寵，似乎都應該尊重下。
小米（01810）同中國鐵塔（00788）獲納入指數前，都有一輪炒作，咁照計百威亞太都應該無咁快玩完，最重要既係佢市值成三千幾億，喺呢啲咁無方向既市況下，無蟹貨又有market liquidity，真係好啱晒各路人馬胃口。
有貨揸住就唔洗講，無貨既不妨係佢創新高時，唔好諗一嘢轟落去，博佢愈升愈有啲人唔敢買。至於幾時轉軚，就留意住佢個全日平均價啦。點解咁做? 因為咁大隻股份，啲機構投資者一定係用CD order，叫個trader跟個 VWAP價（即平均價）去買架喇。周三收市29.7元，全日平均價係29.214元，咁即係反映遠離全日平均價咁高，尾市都仲好多人搶近，買盤氣氛好勁啦。掉返轉諗，即係平均價仲高過收市價時，即係開始沽貨啦，咁到時都要考慮吓係咪要跟沽喇。
股壇潘安
Email: panan201810@gmail.com
本文僅屬個人研究，不構成任何投資建議。
