【與股同行】茅台集團任二股東的貴州銀行

Published on 06-01-2020

猶記得十多年前，四大內銀先後來港上市的時候，曾牽起一股抽新股的浪潮，只要你抽中，就可以等「派彩」。不過，時移勢易，宜家港股內銀氾濫，有啲上咗市你都未必知，好似瀘州銀行（01983）、鄭州銀行（06196）及九江銀行（06190）咁，我諗問十個人，十個都唔知呢啲銀行有上市，莫講話講得出個股票number。

最近隻貴州銀行（06199）上市，又係無人問津，認購情況慘淡。公開發售部份，只有總數的0.25倍。即係話，你要幾多，就派幾多俾你。作為貴州省唯一一家省級城市商業銀行，竟然遭到冷待，只可以話喺呢個偏好新經濟同生物科技股的年代，內銀股題材唔夠吸引，唔啱炒。

新股講供求，愈無人留意既股，其實有時可能仲應該愈要注意，因為貨源歸邊的股票通常都會帶來驚喜，更何況呢啲內銀股就更加唔怕佢有古怪。單日大插七八成的機會，相信微乎其微。況且，睇返佢既背景又唔係太差，股東除咗有貴州省財政廳外，仲有貴州茅台任第二大股東。

呢間貴州茅台，雖然並非A股股王嗰間，而係其母公司茅台集團。不過，貴州銀行與貴州茅台（600519.SH）關係亦相當密切。2017年，後者一份《關於子公司與貴州銀行開展存款業務的關聯交易公告》就提到，其全資子公司「茅台行銷公司」、「茅台醬香公司」和「茅台財務公司」因為經營業務及發展需要，與貴州銀行發生存款業務。具體嚟講，即表示貴州銀行成為咗茅台的結算銀行，而貴州茅台的海量現金流，將為貴州銀行帶來咗源源不絶的儲蓄。